کېچه وصلیدین ییراق عشق اهلی چندان ییغله‌دی
کویدی هم پروانه و شمع شبستان ییغله‌دی
مشرب
بابارحیم مشرب غزلیگه نظیره
ییغله‌دی
یورتیم احوالین کۉریب کۉنگلیم پریشان ییغله‌دی
دوستلردن ایریلیب غربتده حیران ییغله‌دی
قَیته باسدی گل‌له‌گن کۉرکم دیاریم قرغه‌لر
قاچدی بلبل‌لر چمندن کۉنگلی ویران ییغله‌دی
اۉتمیشینگنی اېسگه آلگن جۉره‌لر اۉرتاقلر
کېکسه‌لر هم یاش تۉکیب طفل دبستان ییغله‌دی
بلخ‌ده محمود شه مشرب‌نی اولدیردی آسیب،
ماتمیده اشکمیش، قندوز، نمنگان ییغله‌دی
جان فدا اۉغلانلری نینگ فرقتیده قان یوتیب،
اۉزبېک و تاتار و قیرغیز همده تورکمان ییغله‌دی
منگو بېردی غیرتیدن تیتره‌دی چنگیز خان
باتیر اۉغلانینی یوقلب ملک توران ییغله‌دی.
قادری، چۉلپان و فطرتنی توبن منقورتلر
قیلدی یوق، هجریده تورکستان فراوان ییغله‌دی
اۉتگه یاندیردی نېچه یوزلب کتابینی غنیم
کۉزلریدن یاش تۉکیب اهل خراسان ییغله‌دی
یاغدو ایزلب تون قرانغو آسمانینگگه باقیب،
آی و یولدوز کۉرمه‌یین شمع شبستان ییغله‌دی
ییرتقیچ قاپلان ییدی اېرکه کییک اوغلاغینی،
آرقه‌سیدن تېلموریب بیر نېچه جیران ییغله‌دی
اۉزنی قربان ایله‌دی شیرین گه یېتمه‌ی کوهکن
ماتمیده بیستون تاغی توکیب قان ییغله‌دی
دوحه – قطر
- اپریل. 07
