زین‌الله اوکتای، ۱۳۸۷-ییلی اسلام‌قلعه اۉرته مکتبی اۉقیتووچیسی اۉله‌راق دری تیلی‌ده درس بېره‌باشله‌دی. عینِ دمده اۉقیتووچی تربیه‌لش موسسه‌سی‌نینگ اۉزبېک تیلی و ادبیاتی بۉلیمی‌گه کیریب اونی هم یوکسک درجه‌ده بیتیردی. شو ییللر دوامیده شعر یازیشگه باشله‌گن زین‌الله؛ عالی اۉقووگه کیریش نیتیده اختصاصی سیناوگه قتنه‌شیش نتیجه‌سیده فاریاب بیلیم یورتی تیل و ادبیات فاکولته‌سی‌نینگ اۉزبېک تیلی و ادبیاتی بۉلیمی‌گه یۉل تاپدی. اوشبو بۉلیمنی ۱۳۹۵-ییلی موفقیت بیلن بیتیردی.
اوکتای، کیچیکلیک‌دن سېویملی آنه‌تیلی، کۉرکم تاریخی و پارلاق مدنیتیگه قیزیقیب، ادبی، دینی و تصوفی یۉنه‌لیشلر بۉییچه یازیلگن نوایی، بابر، مشرب، هویدا کبی شاعرلر اثرلرینی اۉقیش یانیده بو یۉنه‌لیشده اۉزینی سینه‌گن. یازگن شعرلری کۉپینچه غزل، مثنوی، مخمس، مستزاد، رباعی، سبزوان/ قۉشیق، چار پاره و مثمن قالبلریده بۉلگن. آق شعر قالبیده هم بیرار پیت یازه‌دی.
هر بیر ادیب و شاعرنی اۉزیگه چېککنی کبی، ایریم عامللر سبب اوکتاینی هم شعریت عالمی اۉزیگه چېککن و شعر یازیش، ادبی توشونیش، ادبیات دنیاسینی ایزلش‌گه توغمه استعدادینی یوزه‌گه چیقاریشی اوچون اونی ناخود آگاه اۉنده‌گن.
شونینگدېک، شاعر اۉز دوریده یشه‌گن بعضی صنعتچیلرنینگ بیر قنچه حماسی، لیریک، اجتماعی و داستانی توس آلگن قۉشیقلرینی تینگلب اولردن الهام آلگن. بو قطارده ملی صنعتچیمیز بۉلمیش رحمتلی ملاتاج‌محمد سرپلی‌نینگ عشقی و حماسی قۉشیقلری یانیده (زين‌العرب، ابراهيم‌ادهم/سلطان ابراهیم، بابامشرب، یوسف و زلیخا، غریب و شاه صنم، بابا روشن، سیف‌الملوک و بدیع جمال کبی) اجرا اېتگن مِلودی داستانلرینی اېشیتیب الهام آلگنینی ایتیش ممکن.
اوزون ییللردن بېری وطنیمیزده بۉلگن ظلم، جفا و ایریمچیلیکلر اېسه؛ هر بیر ادیب و شاعریمیز چیده‌آلمه‌گنی کبی زین‌الله اوکتای‌نینگ هم چیده‌مینی قییگن. او، تاریخ بۉیی سۉنگی ایکی یوز ییلدن کۉپراق زمان ایچیده اۉز ادبیاتی، تاریخی و مدنیتیگه بۉلگن مهرسیزلیکلرنی اۉقیب اۉرگنگنیدن کېین، ملی دردلریگه اوله‌نیب کېتگن و شاعرانه اۉیلاولری بیلن ایجاد اېتیشگه اولگورگن.
دنیا بۉیلب ادبیاتچیلر و ایجادکارلرگه ترقیات، آسوده‌لیک، بې‌غبارلیک، اۉسمیرلیک و سېوینچلی آنلر الهام بېریب کېلگن بۉلسه، بیزنینگ وطنده‌گی سۉنگی ییللرده اېنگ کۉپ خلقیمیزنی قیینه‌گن و ملی روحیمیزنی یره‌دار اېتگن حادثه/ واقعه‌لر، اۉلدیریلیشلر، انسانی حق‌لر یېیلیشی، تېنگ‌سیزلیک، عدالت‌سیزلیک، اداری و مالی فساد، ظلم و ستم، ایکی یوزلیک، الداقچی‌لیک، من_من‌لیک، صمیمت‌سیزلیک، تعصب و ایریمچیلیکلر، مقصدلی خودکش هجومچیلر تربیه اېتیلیشی، وطنیمیز رادیکال توشونچه‌سی و پارتلاوچیلرگه تینچ محل بۉلگنی شاعرگه سلبی تاثیر قۉیگن و ایجاد اوچون الهام بېرووچی نېرسه‌لر بۉلیب قالگن.
شاعرنینگ قیسقه حیاتی الحاج استاد حبيب‌الله احمدی اۉغلی، زین‌الله اوکتای، قویاش ۱۳۶۸-ییلی فاریاب ولایتی شیرین‌تگاب تومنی‌نینگ اسلام قلعه قیشلاغی ده مدنیت پرور و بیلیم‌سېور بیر عایله ده دنیاگه کېلدی.او، باشلنغیچ مکتب‌نی 1375-ییلی اسلام‌قلعه اۉغیل باله‌لر مکتبی‌ده باشلب، آلتینچی صنف‌گچه اۉشه مکتب‌ده اۉقیدی. کیېن ۱۲ـ صنفنی ۱۳۸۱-ییلی ظهیرالدین فاریابی اېرککلر لیسه‌سیده بیتیردی.
