گۉزهل و یاقیملی سېسلی صنعتچی رحمتلی ملا تاج محمد وفاتی‌گه بوگون (۹- دلو/29- جنوری) آلتی ییل تۉلدی.
او، افغانستان اۉزبېک موسیقهسی زمانوی، فولکلور همده داستان کویلش و روایت قیلیش ترماقلری‌نینگ ماهر قۉشیقچیسی اېدی. او، چمهسی ۴۰ ییللیک موسیقی فعالیتی و کوی-قۉشیقلری بیلن اېلیمیز یورهگیدن اۉرین آلدی. ملا تاج محمدنینگ موسیقی صنعتی سرپل «گلشن آرکستری» قۉینیده، استاد انتظار جوزجانی، محمدالله نوری، استاد غفورجان وفا، محمد اعظم عظیمی، محمد شفیع عظیمیلر همکارلیگی و یاردملریده اۉنیب اۉسدی؛
«ظفر آرکستری» بیلن چیرایلی کنسرتلر اۉتکزدی؛ افغانستان ملی رادیوسیده یاقیملی آهنگلر یازیب قالدیردی. شو بیلن، اېل اره‌سیده دانگ ترهتدی.
میلادی 2010-/هجری ۱۳۸۹-ییلی، کیمبریج یونیورسیتیتی‌نینگ بیر تحقیقی پروژهسی اساسیده، سرپل و جوزجان اۉزبېکلری فولکلوری (موسیقی، قۉل صنعتلری، اوی-روزغار بویوملری، آیریم عرف-عادتلر،…) بۉییچه ساحوی ایزلش و تحقیقات ایشلری آلیب بارگندیک. اېسلنگن فولکلور ترماقلردن جدا قیزیق اۉرنک و متریاللر تۉپلندی.
ایزلش‌لر آقیمیده اۉزبېک فولکلور موسیقی و اۉیین‌لری اوچون اوشبو ساحه‌نینگ مشهور صنعتچیلری ملا تاج محمد، فخرالدین، فیض محمد و عمر یۉلداشی سبزهگل خانیم‌نی سرپل و اندخوی دن چارلگندیک.
شبرغان‌ده «آیینه تلویزیونی» استدیوسیده کمره‌مین و تخنیکرلری یاردمیده صنعتچیلرنینگ هر بیری بیلن قیسقه صحبت بۉلیب، بیر قنچه چیرایلی قۉشیقلر یازیب آلیندی.
