گرچه زوغاوم قیلگنلرنی یاقتیرمه‌دیم،
شعر یازدیمو بۉله‌ک ایشنی قاتیرمه‌دیم.
تیلیم توریب اۉز تیلیمده گپیرمه‌دیم،
بیر اېسله‌سه‌م اېزیله‌دی به‌غری-دلیم،
آنه تیلیم، کېچیر مېنی، آنه تیلیم.
آنه‌م «اېرکه‌م» دېب قوچگنده تونلر یریم،
اېرکیم یۉق دېب زیرقیرردی بیر جایلریم،
پروازنی هه‌نسیره‌تگن بوغدایلریم،
آلتینلریم، معدنلریم، ایپکلریم،
آنه تیلیم، کېچیر مېنی، آنه تیلیم.
کیملر اوچون بیز اېدیک بیر بدويلر،
اۉزبېکنی قان قه‌قشه‌تگننی اوزبېک سيلر،
حالیمیزنی قان کوزه‌تدی یسوی ويلر،
تاپگنیمیز هنده‌لکدېک تیلیم-تیلیم،
آنه تیلیم، کېچیر مېنی، آنه تیلیم.
کیمدیر ميده ملت بۉلدی، کیمدیر کتّه،
کتّه ملت — افندیسی یۉکدیر حتا،
بیز پیاده، بیز باققنلر یوردی آتده،
ظلم اۉتسه فقط سېندن اۉتدی ظلم،
آنه تیلیم، کېچیر مېنی، آنه تیلیم.
سېن بۉلمه‌سه‌نگ نیمه بیزگه سیللیق شعرلر،
بو دنیاده تیلی یۉکده دل یۉق دېرلر،
بهاینگ-کو بېریب کېتگن علیشېرلر،
یوره‌گیم نینگ تۉریده‌گی سۉلمس گُلیم،
آنه تیلیم، کېچیر مېنی، آنه تیلیم.
بیر قره‌سه‌م هر شېوه‌نگده مینگ جِلالر
هر نوده‌نگده، هر مېوه‌نگده مینگ جِلالر.
قادريلر، چۉلپانلر-او، عبداللالر،
سېنینگ قَیتگن کونینگ مېن توغیلگن ییلیم،
آنه تیلیم، اې مقّدس آنه تیلیم.
Garchi zug’um qilganlarni yoqtirmadim,
She’r yozdimu bo’lak ishni qotirmadim.
Tilim turib o’z tilimda gapirmadim,
Bir eslasam eziladi bag’ri-dilim,
Ona tilim, kechir meni, ona tilim.
Onam «erkam» deb quchganda tunlar yarim,
Erkim yo’q deb zirqirardi bir joylarim,
Parovozni hansiratgan bug’doylarim,
Oltinlarim, ma’danlarim, ipaklarim,
Ona tilim, kechir meni, ona tilim.
Kimlar uchun biz edik bir badaviylar,
O’zbekni qon qaqshatganni uzbek siylar,
Holimizni qon kuzatdi Yassaviylar,
Topganimiz handalakdek tilim-tilim,
Ona tilim, kechir meni, ona tilim.
Kimdir mayda millat bo’ldi, kimdir katta,
Katta millat — Afandisi yo’kdir hatto,
Biz piyoda, biz boqqanlar yurdi otda,
Zulm o’tsa faqat sendan o’tdi zulm,
Ona tilim, kechir meni, ona tilim.
Sen bo’lmasang nima bizga sillik she’rlar,
Bu dunyoda tili yo’kda dil yo’q derlar,
Bahoing-ku berib ketgan Alisherlar,
Yuragimning to’ridagi so’lmas gulim,
Ona tilim, kechir meni, ona tilim.
Bir qarasam har shevangda ming jilolar
Har novdangda, har mevangda ming jilolar.
Qodiriylar, Cho’lponlar-u, Abdullolar,
Sening qaytgan kuning men tug’ilgan yilim,
Ona tilim, ey muqaddas Ona tilim.
